Skip to content

同熱愛這片土地 流浪攝的香港山野攝影成功之道

Written by

清君

流浪攝,一個在攝影界響噹噹的名字,根據他們披露大大小小出道初年都已經接受了百多個訪問,數量十分驚人。那麼,這次破BigfoolHK訪問他們,又有什麼獨特之處?請你繼續滑下去,就會知道了。

探索流浪攝的起源

流浪攝大家都知道成員有三位:聯C兄、露伊和Tony,但原來三人未組成流浪攝之前,是一大群人去影相,尤其是影日出。「好鍾意周圍影相,去啲特別少少嘅地方、捐窿捐罅,變咗核心精神去啲難嘅,偏門嘅地方。」

後來越去越難,就像淘汰賽一樣,變成這三個黃金鐵三角組合。那麼,這個組合有沒有什麼理念呢?

流浪攝
流浪攝Facebook頭像

受訪者不約而同地答:「冇㗎。」不過之後有補充:「最初是抱著玩的心態,覺得天氣好就去影下相。」後來有攝影界前輩鼓勵他們開設網站及進駐一些平台,透過網絡將相片分享給更多人欣賞,才漸漸形成這個專業團隊。

「影影下發覺,我哋住喺呢個地方,香港係值得我哋自豪嘅地方,於是就想將一啲理念帶出嚟,例如環境保育呀、香港發展呀……」流浪攝提到,他們影相都會想盡量保存自然環境面貌,現時所持信念是想透過相片及文字,引起到市民及傳媒注意,原來香港也有很多優美的自然景色,不是外國才有。

但是,流浪攝團隊並不是全職攝影的,他們是工餘時間,又或者特意請假去攝影;那麼,他們又如何平衡工作與興趣?

「其實都冇話特登去平衡。」他們解釋:「其實最主要,就係用晒工作以外嘅時間囉。平時我地做嘢主要都係會喺lunch嘅時候溝通;處理檔案又或者影完相要執相嘅,咪動用埋夜晚嘅時間。」露伊說,夜晚可能由九點到半夜一兩點都仍然在忙相片的事務,交通、休息、假期等所有時間,就都花在攝影上面了。

當興趣變成工作時 一切都容易走樣

來到一個比較關鍵的問題,「興趣變成工作」,但其實流浪攝又不完全將攝影當成工作,頂多是額外的商業收入。問及他們是否有周詳計劃及部署,他們答道:「當然就唔係預先計劃好啦」,聯C兄說他們的收入,其實都是自然而然生成,所謂自然生成,指的是外人見到他們的東西質素好,建立了口碑便有麝自然香。

流浪攝成員露伊及聯師兄

然而,他們走到今天這一步,或多或少也要向他們的前輩道謝。「嗰陣做咗百幾個訪問,就有前輩同我哋講要升級器材設備,如果有人鍾意你哋啲咁特別又靚嘅相,你哋而家用啲初階機未必應付到喎。」可幸的是,後來真的有人賞識他們,無論合作也好、買相也好,越來越多商業上的往來,到後來發展出旅遊團、攝影班、相展等等。

不過,凡事總不會一帆風順。他們提出一個非常印象深刻的案例,有次他們跟一個旅行社合作,「所有嘢都夾好晒㗎喇,行程吖價錢吖日期吖,對方就突然,呃,加團費。」加團費對於已經參團的朋友來講,非常不公平,那間旅行社就說,如果流浪攝不同意加團費這個舉動,那唯有減少酬勞吧。「即係減我哋導師費呀,咁我哋更加唔同意啦。」周旋一段時間,他們立即迅速行動,去找自己於旅遊業界的相熟友好,在短短一兩日內將整個旅遊攝影團轉移至另一間旅行社,都可以算是一場壯舉。

除了Facebook及其他網絡平台以外,流浪攝更有出版書籍,直接由實體印刷這個媒介接觸不同社區的人──每一區都有書店,新書又有發布會,那麼他們除了《冰島攝一圈》,其實還有出版《香港攝一圈》、《香港攝二圈》、《香港遊玩攻略八十八》,這三本書,「老套啲講,係我哋好熱愛香港,咁我哋周圍去影盡佢嘅美麗面貌。」流浪攝相信的是,「好嘅內容,好嘅文字,好嘅相片,好嘅故事,可以流傳得更長久同埋啟發到更多嘅人。」

向成功叩門 = 一百分的努力汗水加一百分的堅持

流浪攝的努力,令他們獲得雙年獎及金閱獎。他們的攝影集,除了靚相以外,還有很多資訊、有地圖等等,成功除了努力以外,也貴在堅持。

「只要去keep住你哋做緊嘅嘢,一直keep,你哋已經係贏咗㗎啦,我哋到而家都記住㗎。」流浪攝說前人有跟他們講過這一句話,七年的攝影歲月,說長不長,話短不短,但是明顯地,他們堅持影下去,「七、八年前一齊影相嗰班朋友,大部分都冇影相啦。」所以,除了出書、教班等等,他們也有辦相展。

「有人問我哋:『喂,我睇你哋啲相,睇流浪攝啲相,睇你Facebook咪得囉,睇你個網咪得囉、睇你啲blog咪得囉,做乜要曬張相出黎,痴落幅牆度,然後要搭車去睇咁麻煩啊?』咁我哋初頭都有疑惑嘅。」但當相展舉辦時,他們的疑惑近乎一掃而空。「嘉賓、讀者嚟到現場,親自同你交流、傾偈,你就會明白有幾唔同。」

交流當然聽到很多意見,例如「你啲相好靚呀」、「你啲相影得唔錯呀」這類說話,聯C兄說他聽到這些意見,只會「聽住先,我自己心知肚明好唔好」。但最令他們感動和深刻的,是有些年紀比較大的長輩,行動不太方便的那些,「佢哋會話,呢張相啊嗰張相呀,我以前後生時都去過嘅,都係好靚嘅,不過而家我老咗啦,我去唔到呢啲地方啦,好多謝你哋將呢啲咁嘅畫面帶畀我回憶,令我可以諗返起以前後生嗰陣」。

流浪攝成員露伊及聯師兄

賺到的不應只是金錢 保持初心最重要

問到商業攝影範疇,流浪攝表示他們也曾經學習過婚攝。只是沒有花很多時間在上面。「其實而家同影相有關嘅項目,有人搵我哋,我哋都會盡量參與,咁小朋友家庭照呀、畢業相呀、Big Day等等咁。」不過他們就比較低調,沒有特別放出來。他們視攝影的商業收入為額外收入,但多數是用來補貼又或者叫做贊助他們添設器材裝備,本身維生,都是靠正職。

你可能也喜歡  脫離時代背景只是單純的愛情故事:《返校》提醒大家自由來之不易 / 清君

「好多人都會問㗎,會唔會將興趣當全職,我哋都答過好多次,我哋由第一日開始視攝影為興趣,如果變成全職,好大機會變質,主導權又唔喺自己手度啦咁。所以我哋都只會將攝影當成興趣去做。」

保持初心非常重要,同時也是一件困難的事,當問及他們會否再擴充規模,他們已經「耍手擰頭」:「其實我地而家都算係發到最大嚟做啦,我哋每年出版書啦,帶團啦,攝影班啦,搞活動啦等等……真係盡晒力啦。」將一件事堅持為興趣去做,用盡自己所有時間去做,真的是非常有熱情才能做到。「好似教班,我哋一次教晒,你問我答,你唔問我都照講照教,唔好將凡事睇到咁商業。」

做好本質糾正心態 為Freelancer生涯踏出第一步

問到假如有年輕人想以攝影這範疇,作為Freelancer生涯發展,流浪攝有沒有tips給他們呢?

第一樣,是流浪攝的信念:好嘅內容。「你第一樣係要影好你嘅相,技術係永恆嘅,你靠吹噓靠宣傳,件事唔會長久。」

第二樣,是心態。流浪攝提醒大家不要急功近利,有時候回報未必是實體的錢銀,有時候賺的是經驗、朋友、人脈、眼界……這些無形的東西都是未來的資本,故此鍛鍊出好技術掌握到好內容以後,就是要調整好心態,要控制自己的好勝心。

那麼,第一步如何踏出?如何開展這個生涯?

「渠道都係嗰啲啦,Youtube、放Facebook呢啲,你要發表咗先。」簡單來講,是要讓人看得見,然後,露伊提出一個重要的論點:「我哋就唔係好刻意去做嘢,所有嘢都係好自然咁去做。」

開展Freelancer生涯以後,會伴隨來不少合作,流浪攝作為過來人,他們也只能提醒各位後來者:「大家要有自己嘅位置同立場,要知道自己嘅權利同做到啲咩。所有嘢咩好白紙黑字記清楚,唔好因為急於要成就一啲嘢而畀人亂咁壓榨你。」

流浪攝的成功之道 一切由正名開始?

相信大家都聽過一句話:「唔怕生壞命,最怕改亂名。」做事前先要正名,名正則言順嘛,那麼,「流浪攝」這三個字,這一個品牌的成功之道是什麼呢?

他們非常謙卑地答道:「我哋唔能夠自認自己因為流浪攝就成功嘅,不過呢,就相對地突出啲囉。」而流浪攝有個獨特之處,大家知道他們有三位成員,但所有相片都沒有落個人署名,所有都是「流浪攝」,而這個名字亦非常配合他們正在做的事。「呢三個字,總結咗我哋嘅精神同行為,我哋真係流浪咁囉。」

不說又不知道,原來「流浪攝」是二次創作?「你可以話係富士嘅浪攝流嘅二次創作嚟嘅」,聯C兄這樣道。但他要強調一點,就是「浪攝流」是街拍,但「流浪攝」是山野攝影,曾經有人指他們抄襲,他們都沒好氣搭理,這同樣也是他們贈給後進的一番話語,「其實網絡欺凌,可以唔使理佢。佢繼續講囉,你唔答、唔鬧,做好自己嘢就冇事㗎啦。」 總括而言,流浪攝給大家的貼士,包括:大家要開展某一範疇的事業時,首先要做好本質,這個本質放在任何行業上都會有不同答案。然後就要發表,多找渠道發表讓人知道有好的本質存在。然後被動地認識人也好,主動地認識人也好,擴闊自己的社交圈子,到有工作時,要保持自我勿忘初心,清楚了解自己權利和位置。說似乎很容易,但貴乎堅持和熱情,大家共勉!


近半年香港面臨前所未見的人禍,很多美好的人、事正逐漸消失。唯願人性光輝仍然閃耀,香港萬安。

文/清君
攝影/Matthew
統籌/Ryan
協力/Kiu

最後更新日期: 2020-12-16

Previous article

浮世──影像與文字合體的威力

Next article

文化觀察:滲透戰略將短時間內圍堵剿滅本土創作圈

Join the discussion

發表回覆

你的電郵地址並不會被公開。 必要欄位標記為 *