接Freelance job遇上壓價嘅時候，你會點做呢？
Written by
接Freelance Job，其實類似傾生意，雙方都會有一個談判過程，工作內容、報價、還價等等。唔少Freelancer都會遇到壓價呢回事，當客戶壓價，Freelancer點做好呢？
睇睇Freelancer點講：
一係唔做，一係調整提供嘅服務：
1、可以選擇霸氣地直接拒絕接份freelance：唔做！
2、視乎客戶喺日後嘅合作潛力，值唔值得減價接freelance變相作為關係嘅長遠投資。如果態度誠懇殷切，可以考慮磋商接份freelance，態度唔好嘅，都係唔做！
3、可以因應客戶畀出嚟嘅預算，去調節自己提供嘅freelance服務，並設立一啲限制條件，達至雙嬴。
遇惡意要識拒絕，同時要學識遠視：
好多時候，如果大家只係接freelance而冇其他收入來源，絕對會係手停口停，但係喺遇上壓價嘅時候（好多時候係無理壓價）就要衡量下，以投資目光去檢視到底呢一個客戶值唔值得你放時間心機金錢落去，佢有冇發展潛力，未來會唔會想繼續同佢合作等等。
如果客戶態度好差，根本係為壓而壓，第一合作係唔會愉快，第二係你下次都唔會有機會加返價，第三你好難係咁嘅狀態底下發揮100%實力，呢種單次合作係絕對唔值得減價去配合，而且如果因為合作唔順利而影響到口碑就更加唔值得，畢竟口碑信譽係自己嘅，相信大家都唔想額頭鑿住「廉價勞工」四隻字或者被標籤成劣質freelancer。
面對不公或者惡意，要識得拒絕、嗌唔做，咁先至夠襟撈。客戶壓得你一次價，自然可以壓第二次、壓第三次……要記住，每個人都有自己專業同專長，要知道自己喺市場上嘅定位，唔好為咗一份freelance job而做爛個市，對自己、對成個市場都唔係一件好事。如果再遇到壓價，記得要權衡過先好畀答覆！
如果你都係Creator/Freelancer或者對創作有興趣，都歡迎入Group一齊交流下！
有興趣可以睇埋這個系列嘅其他文章：
最後更新日期: 2020-12-16
Join the discussion